The Incredibles

o係DJ度﹐見到蔡瀾講起這套The Incredibles 電影﹐都等o左好耐﹐記得好似係o係睇 spiderman 時睇到的預告。我一向也是Pixar製作的fans﹐所以都十分期待。只係睇片頭﹐我已經笑死了。十一月五號就上啦﹗有冇人有興趣一齊睇呀﹗

STM分享(九) - 去巴西短宣必備

聖經 - 我極力推介NIV Study bible﹐因為資料詳盡﹐萬一要“食雞”(即臨時要你講道﹐帶查經﹐帶靈修)﹐都有o野可以講呀馬﹗
傳單 - 呢樣野大家都知道用來做乜﹐唔使驚會唔記得帶﹐領隊一定會提醒你的。
詩歌集 - IG幫我地整o左本好好的詩歌集﹐以前都唔覺得有禁多詩歌禁好聽﹗
怕蚊水 - 我就唔係搽了很多﹐但係啊魚太就無怕蚊水不歡o羅﹗
防晒 - 基本上﹐我逢親旅行都會帶備﹐驚會變成隻黑豬返花旗﹐無人認得我呀馬。不過﹐今次其他人都有搽﹐因為巴西D太陽都幾勁﹐唔想晒傷﹗
止癢膏 - 呢支藥膏真係好有用﹐因為D蚊實太利害﹐針一針真係腫到雞蛋禁大。
藥品 - 頭痛藥﹐感冒藥﹐止瀉藥等都十分有用。我今次就係帶小了感冒藥就病到死o下死o下返花旗。
小筆記 - 除了要記低係當地發生的一點一滴﹐仲有就係可以用來寫低人地個名﹐地址等﹐可在等日後有個聯絡。
筆- 多支不同顏色的筆會比較好﹐可以用來寫下不同的感想。
膠紙 - 用來貼你們的小紙仔的。
書籤- 帶備這些有金句的小書籤﹐可以當作卡片之用﹐寫低自己的名字和電郵地址送比人﹐好好用。

我諗仲有好多必備﹐不能盡錄...

STM分享(八) - 生活習慣

我們所到的巴西里約其實並不是個十分落後的地方﹐最小在當地的弟兄姊妹所用的手機﹐是比我們所用的先進幾倍。不過唔知係唔係佢地其他o既生活水平比較低﹐所以生活比較節儉。有很多地方﹐如餐廳﹐商店﹐的士等雖然有冷氣但係唔會開。我們去的時候﹐有幾天是差不多40C﹐真係熱力沒法擋o架﹗但佢地依然只係開著把風扇吹吹﹗而我們所用的紙杯紙碟紙巾﹐亦和花旗的相差很遠。花旗o既紙品類產品﹐有好多真係可以用完洗乾淨再用﹐而相比巴西個D就比較脆弱。有時大力一點拿著個杯都會將個杯弄破。我個人都十分支持環保﹐但我都明白﹐D碟同杯用一陣就溶的麻煩。如何在當中取得平衡﹐真係好重要。

好的開始

很耐之前﹐已經很想深入D睇o下使徒行傳同保羅書信的關係。但係人始終係有懶根﹐況且我唔止有一條﹐所以都仲係o係得個“講”字既階段。多得你地推一推我。雖然只會睇其中的部份﹐而我又唔知我有冇恆心睇落去﹐但係都叫做有個開始。或者多D分享會刺激我,勤力D睇聖經﹗

莫再悲

詞：鄭國江　唱：林子祥

莫再悲　莫再傷　遇到悲哀休誇張
誰亦要經風與浪　誰遇挫敗不受傷

逝去的　莫再想　路正崎嶇更漫長
何用嘆息風裡望　寶貴光陰笑著量

愁和哀　風與霜　不會天天都探訪
用幻想　與夢想　編織那遠大理想

斜陽好　花正香　跟那寂寞和著唱
歌聲一句句　跳越屏障赴遠方

默默的分享　默默的欣賞
路上一切美麗況
人生總會碰著悲哀苦惱
為何流淚看

幸運不希罕　熱淚不輕淌
願做真正既硬漢
何必口說快樂心中一個樣

實力派

尋日睇勁歌﹐聽到近期安仔同葉德嫻的“美中不足”﹐嘩﹗唱live真係超正。其實我都好少click去睇勁歌現場﹐因為實在有太多偶像唱到走晒音﹐所以我是比較喜歡追看勁歌的MTV多於現場勁歌(Twins 呀﹗Boy'z 呀﹗ 的MTV是比較好睇)。大家得間不防click 去睇睇﹐今年年尾D的頒獎禮﹐我又會支持安仔。希望啊Larry﹐唔好過來踩場...哈哈﹗講o下笑o者﹗

“美中不足”Live

當年情

已經好耐無玩得禁癲﹐星期六一整天的朋友S婚禮﹐聚舊﹐返回本城。星期日又再上去朋友S教會度崇拜﹐然後再和好友J見面見面﹐仲要黃昏趕返本城去STM分享會。幸好有BL陪我一齊癲﹗坐幾粒鐘上上落落 哈哈﹗其實論癲的情度﹐我是比不上BL的。

今次參加朋友S的婚禮﹐真係有幾多感想。回想當年同朋友S在揚恩的日子﹐還有一齊take circuit 101的經歷﹐真係好似剛剛發生的事一樣。人係會成熟既﹗見朋友S改變了不少﹐而且對神的心越來越堅定。怎會想到當年的他會現在為神奉獻自己的一生呢﹖而且還在主內找到他的另一半﹐一同服事主﹐真係“鄧”佢開心。今次他的婚禮﹐還見番一D老朋友﹐雖然有D在威爺的婚禮上見過﹐事隔原來已經都年幾了。日子過得真係﹗

好友J雖然在星期六已經見到面﹐但因為人太多都冇乜點頃計。所以預先已約好星期日再見﹐真係明智之舉。BL醒目﹐決定去飲茶﹐這樣便有個地方可以“飲淡茶﹐食個包”﹐慢慢頃了。我地去o左Flushing 的金豐大酒樓飲茶﹐水準唔錯嫁﹗有幾多款式的點心﹐我地都點o左十幾碟點心﹐而且在本城是沒有見過的。

我地三個女人一個墟﹐由朋友的近況到教會生活﹐由未來的動向到大家的工作大計。真係頃得好鬼開心。好友J無乜點變﹐依然是ca ca大笑﹐但做起事上來又十分有分寸。雖然今次一別又唔知幾時再見﹐但我同BL都同時間要求好友J多D上來我地個blog度﹐同多D上YM﹐禁大家咪可以成日見面囉﹗

趕到去魚生屋企﹐各位短宣的弟兄姊妹已經到達晒。約翰帶備他的無線上網卡﹐我們在魚生屋企竟然可以和巴西的姊妹啊群啊英MSN IM 上網通訊。我地又即刻影相上載上網﹐比佢地見o下我地個貓樣。哈哈﹗科技日新越異﹐越來越發覺個世界越來越細﹐神既國真係好快就到﹐我地要怎樣準備自己見神的面?噢﹗我還有很多親戚朋友還未信耶穌﹐真係為你們心急同擔心﹗

STM分享(七) - 為福音而食

有很多弟兄姊妹﹐朋友問我今次係巴西﹐在“食”方面如何﹖哈哈﹗我可以答你﹐是比我在花旗國的好。除了每日在酒店有任食超正早餐(最小吃一個木瓜﹐養顏ma﹗)﹐還有真正的巴西燒烤﹐珍姐的住家飯外﹐我們每到探訪的店舖或家庭﹐人家總是叫我們吃吃吃喝喝喝的﹐十分客氣。我們雖然搬出“唔水law”﹐但他們仍將食物﹐飲品放在我們面前。泉哥同魚生都教我地盡量食D或者飲D﹐表現得親切一點ma。

位於南美的巴西﹐生果特別正﹐而且好平。一箱木瓜都只不過是六蚊巴紙即係差唔多兩蚊美金。而任食的超正巴西燒烤都只不過是二十多元巴紙。所以大家都在此行增磅不少。幸好我們每天都要行好多路﹐都burn到唔小fat走。如果唔係真係"為福音而肥"了﹗

人肉旅遊雜誌 - 羅伯

去o左羅伯屋企食飯﹐雖然係美其名幫佢整部電腦﹐實質係去“痴o下餐”﹐食o下住家飯。羅伯同羅太同是愛好旅遊之人﹐每次去佢地屋企食飯﹐大家都會好雀躍談論近期去過邊度玩﹐佢地更加會介紹在網上發現什麼超“荀”的旅遊package。今次亦唔例外﹐我地講起去東歐﹐北歐等地。他們喜歡join團﹐因為唔使煩﹐而且佢比我睇o個D團費又唔係好貴﹐包酒店﹐機票而且又有領隊帶﹐都係幾“抵”。哈哈﹗佢講得非常吸引架﹐真係唔做sales﹐"sin"晒﹗忽發奇想﹐唔知有冇機會同佢地一齊去o下旅行﹐我諗會幾好玩。唔好睇羅伯有番禁上下﹐其實佢好玩得。

我個人唔係禁鍾意參加旅行團﹐因為要好早起身﹐自由度又無禁大﹐但係羅伯話去旅行﹐當然係要睇多D o野啦﹗禁我都明。羅太話羅伯每出外玩﹐都晨早就起身﹐玩到夜夜到唔訓。所以論體力﹐我呢D未必可以和他相比。

今次佢介紹o左以下三個sites 比我﹐我想,不如在此處和大家分享一下﹐話唔定大家會發現有超“抵”package一齊去玩﹗

http://www.go-today.com
http://www.affordablegate1tours.com
http://www.friendlyplanet.com

用倉頡,速成打中文

最近有很多朋友問我點樣學打中文﹐因為佢地都好想學識打中文﹐寫文章﹐寫電郵﹐YM都傳神一點。其實我都係打得麻麻地﹐有好多字都係查字典查番來﹐而且有好多中文字已經唔記得點寫﹐所以好多時寫錯字。而我一學就學倉頡﹐所以始終對倉頡有好感﹐不過去完巴西﹐魚生教o左我用速成﹐原來仲容易用﹐大家不防試試。其實速成同倉頡差唔多,都係用同一部首輸入﹐不過速成只需要頭尾兩個部首﹐就可以搵番個字出來﹐唔使好似倉頡要知道全部部首至出到個字。我誠意推介比想學打中文的朋友。

雖然已經電郵過比團契的email list。但我也想籍這個小小的空間﹐再post多次條link﹐
http://www.fed.cuhk.edu.hk/readwrite/typing/
除此之外﹐還有這個 http://www.ied.edu.hk/cj/ 都有很多關於倉頡輸入法的網站。希望幫到大家打中文啦﹗

p.s.如果你想知道點樣切定速成輸入法﹐可以email我。

STM分享(六) - 中秋節晚會

兩個星期的短宣﹐其中之一的重頭戲係同當地的弟兄姊妹﹐朋友﹐鄉里共渡中秋。正所謂“每逢佳節倍思親”﹐據說有很多鄉里已有很多年無玩過燈謎﹐食o下月餅。今次我地帶o左十二盒月餅﹐三十幾個燈籠加D零食呀水果禁﹐真係幾有氣氛架﹗而我最深刻印象的是一個叫做華姐o既女士﹐佢o既經歷真係幾慘架﹗唔知係唔係禁o既原因﹐我見到佢成日都係好愁眉苦臉。但係o係中秋節個晚﹐我見佢玩得好開心架﹗成個人都唔同o左。好在佢已經信o左耶穌﹐我地可以用聖經鼓勵佢。唉﹗人生唔如意的事﹐實在有太多﹐有時都會諗o下點解呢D事會發生﹐不過睇到聖經話﹕

他對我說、我的恩典夠你用的．因為我的能力、是在人的軟弱上顯得完全．所以我更喜歡誇自己的軟弱、好叫基督的能力覆庇我(林後12：9)

神容許每件事的發生都有其目的﹐以平常心去面對﹐神必會使你學到要學的功課。

<金枝慾孽>限量珍藏版DVD

最近成日係“大飲茶”﹐蘋果等度睇到呢套劇如何如何收得。昨日老死電郵來﹐因為佢o係無記度做﹐最近佢收到公司電郵話可以內部認購﹐問我有冇興趣買。嘩﹗睇o下佢地張poster﹐無記只出三千套﹐每人可以內部認購一套。如果多過三千人買﹐就要抽籤﹐認真誇張﹗

香江夜景

一向我都有追看無記的勁歌金曲MTV﹐無辨法生活苦悶﹐要看網上的MTV來調劑一下。近日看了梁炳的“艦隊”。嘩﹗有幾個鏡頭影得香江夜景幾靚。香江夜景真係正﹗
艦隊MTV

忙碌的週末

好友J電郵來說要隨夫在十一月遷移到上海﹐所以諗住在這個星期過來東岸見見D朋友。於是打個電話和她聊聊。她依然是十分可愛﹐一聽到是我就尖叫同哈哈的大笑。估唔到一轉眼又已經幾年了﹐上次大家見面是和BL參加她的婚禮。噢﹗日子過得真係快﹗哈哈﹗有D懷念以前一齊返團契﹐一齊去祈禱會的日子。大家講o下近況﹐我依然是那份工作﹐同一住所。唉﹗仲比佢笑我依然住o係D禁悶o既地方﹐無乜點變。大家已經相約好這個星期天見面﹐真係十分期待。噢﹗還有舊同學S的婚禮和STM的分享檢討會﹐這個週末真係節目多籮籮﹗

對不起﹗錯過了你的電郵

o岩o岩至得閒check check 呢個blog個email﹐嘩﹗成五十幾個電郵﹐check check o下嚇然發現一個由香江傳送過來的電郵。雖然我並不認識你﹐雖然我唔知可唔可以幫到你﹐但如果仲要我幫的話﹐再電郵我。

STM分享(五) - 你們的小紙仔(little message)

在未出發之前﹐已在本blog介紹過﹐教會和團契所給予一份愛心禮物包。內有一包小紙仔﹐是弟兄姊妹寫給我的一些鼓勵。初初打開來看時﹐是有點失望的。只得六張紙仔﹐噢﹗原來我只有這些朋友關心我的短宣。到上機o個日﹐魚太先至將其餘三十多張的小紙仔交給我。原來是分兩次比的﹐嚇得我呀﹗

o係度多謝大家的小紙仔和禱告﹐好多小紙仔都好有心思。有D係首詩﹐有D係幅畫﹐有D係書籤。有很多好搞笑o架﹐又有鼓勵性﹐睇唔出大家係禁creative。 據說我地有人收到張紙仔係有包鹽﹐真係有意思啦﹗

青蛙王子的心意

我對於詩詞歌賦真係一D都唔認識。某日青蛙王子來電﹐話想送首詩比本blog讀者。睇過之後﹐覺得青蛙王子文采頂瓜瓜﹐一D都唔似讀“Sin銀子”。

北風不來﹐
冬的逸興不飛﹐
暫惜光明一刻﹐
問問幾時舞於自然。

捕捉一縷風﹐
軟得無可追從﹐
何時變得溫馴﹖
借來人間一用。

牆的另一隅﹐
擺著神的禮讚﹐
何以至今仍幽幽﹖
何以你只在牆外﹐停留﹖

* * *

踏步﹐踏在紫色的路﹐
邁向未知的未來﹐
散溢著蓄發的神采。

願為誰在佇候﹖
聆聽水波輕奏﹐
金風玉露相逢﹐
人間依舊。

微光中的清晨﹐
寧願取長途(或窄路)
擷摘靜裡的一片溫馨﹐
多走人生幾步。

- 青蛙王子

STM分享(四) - 台山話

我們所接觸的大多數巴西新移民﹐都是來自中國大陸的四邑。所以如果你能說得一口流利的台山話﹐開平話等﹐對於和他們交談是很有建設性的。最小他們會留心聽聽你這個鄉里﹐做乜千里迢迢來到巴西去探望他﹐ 又或者o係打開話題時比較容易。他們有很多為了生活﹐離開自己的家人﹐兒女﹐偷渡到巴西。當中的辛苦﹐真係唔係每個人都可以明白。而我地探訪他們的目的﹐都只不過係聽o下佢地講野﹐比佢地訴o下苦﹐介紹耶穌基督比佢地。要知道我地跟本做唔到D乜o野﹐聽佢地訴苦都只不過聽兩三個鐘﹐點會好得過神可以廿四小時聽佢地訴苦呢﹗

後來我更加發覺﹐如果你不是鄉里﹐但懂得用鄉下話同佢地溝通﹐佢地更加會對你另眼相看。或者你下次係本城的唐人街可以試試﹐最最要緊係學識這句“係mor”,“唔水law”﹐真係十分有用。

原地搭步

和日語同學I同C講開電話﹐問起大家的近況。因為要照顧媽媽﹐已經有年幾無返日文。哈哈﹗真係連Konnichiwa都唔識講。佢地話因為老師近日都身體不適﹐所以上課的日子都不是十分穩定﹐大家依然係用緊同一本書﹐學緊同一樣o野。所以如果我上返堂﹐都唔會錯過太多。有時我覺得“學如逆水行舟﹐不進則退”。禁樣原地搭步的學習﹐我又唔係禁想﹐所以仲係掙扎緊join定唔join。懊惱﹗

STM分享(三) -我最enjoy的時間

有好多人問我﹐今次STM最鍾意係乜﹖唔﹗我最享受的是每天的靈修時間。 每天的靈修時間是這樣的﹐我們八個輪流帶自己在聖經中領受的。之後每人都會feedback一下自己的睇法。分享的不是單單聖經的經文﹐還有我們生活上的掙扎。是坦誠﹐有感動的﹐有感恩的﹐真係有血有淚兼且有virus。記得有一日﹐有人分享,行神的道路是窄的﹐會感到孤單的。但神話﹐不用怕﹐因為佢會背起你行。就好似詩篇120篇﹕

“我要向山舉目﹐我的幫助從何而來﹖我的幫助從造天地的耶和華而來”

唉﹗唔知要幾時至有機會有呢D禁正的分享時間啦﹗