BLACK FRIDAY

這幾年的BLACK FRIDAY 都不在本市渡過﹐今年總算不用回鄉探親。於是上網睇睇BLACK FRIDAY 有乜野減價﹗當中真係有好多好低既DEAL。不過相機又未壞﹐電腦又有啦﹗禁又無理由再使錢買既﹗所以而家都係得個睇字﹗仲要一路睇一路忍﹗﹗

心郁郁想買電話

收到公司送既十年木牌﹐時間飛逝﹐禁就獻出o左我既黃金十年﹗﹗木牌背後竟然貼有一張400大元既GIFT CERTIFICATE。哈哈哈﹗雖然我鍾意現金多D﹐不過﹐好過五年服務既禮物包。

有錢就身痕(阿大劉話既)﹗﹗個腦即刻浮現出想買既IPHONE﹐係好OUT架啦﹗不過仲係十五﹑十六﹗﹗唔知好唔好買﹗﹗之前想買BLACKBERRY﹐不過問o左好多人都話唔好買﹗﹗用緊IPHONE既同志﹐好唔好買呀?

之後CHECK下張GIFT CERTIFICATE﹐好多地方都用唔到既﹗﹗唔係間間SHOP都收﹗﹗一場歡喜一場空﹗﹗可能用張GIFT CERTIFICATE 買KITCHEN-AID算啦﹗﹗

臨放工李老闆打電話黎傾o左兩句公司既是非﹐搞到成六點八至走﹐即刻飛車番屋企煮飯﹗昨日晚餐

芥蘭牛 + XO 醬炒意粉

家居急救常識 - Don't Panic

雖然我唔係醫護人員﹐但係就越來越覺得每個家庭成員都需要學一些家居急救學既知識﹐就算唔識急救都要識一樣野"Don't Panic"。

話說鄭生個鼻一向都會好易流血﹐佢又時時多手搞佢﹐令流血的情況越來越嚴重。有見及此﹐我哦o左佢好耐要佢睇專科醫生﹐前個星期終於睇o左。佢話醫生放o左D藥物入鼻﹐令佢唔係好舒服﹐不過醫生話過幾日D藥會自己出番黎唔使擔心。

就係尋晚食完肉球意粉﹐佢又係到搞個鼻﹐終於個鼻又出血。初初都無乜野﹐佢用D紙塞住佢都無流血。禁我就去梳洗啦﹗沖到一半聽到鄭生大叫話好多血。搞到我要o拿o拿淋沖咪個半去睇下佢乜野事。好在我以前中學時代學過下D急救既常識﹐一睇之下﹐係D血不停禁滴﹐但係唔係水柱個種﹐禁我咪要鄭生坐定﹐用手同D紙按實出血地方等半個鐘﹐睇下仲有無流啦﹗

雖然按o左半個鐘仲有流﹐不過無好似個水喉禁滴滴滴都已經好好啦﹗所以Don't Panic真係好緊要﹐就算唔知點做都要識得打電話CALL白車﹗

見佢個騰雞樣﹐我真係有D擔心﹐佢係產房會唔會暈低﹗

今日借o左

天陰陰﹐毛毛雨﹗﹗

本週末鄭氏劇場會睇﹕The break-up﹐舊野黎既﹗仲未睇﹗

尋晚開會﹐樑木講起呢本書 The Case for Faith﹐見圖書館有﹐借咪番屋企睇﹗

仲有WARREN BUFFETT 既 THE SNOW BALL﹐好鬼厚﹗都係借AUDIO BOOK 好﹗

網上購物

網上購物其實唔係新鮮﹐不過就好似只有外國才盛行﹐香趕買野實在太方便﹐而且時時都有減價﹐唔使係網上買平野﹗﹗
之前一路搵﹐想買對無尾波鞋﹐方便出街唔使著鞋著得辛苦。去OUTLET見唔到﹐去KOHL’S﹐ TARGET﹐TJ MAXX個D都無﹐唔知係唔係就快冬天換季﹐定係已經唔興OUT晒﹗一路都搵唔到﹗今朝先醒起﹐可以去SHOEBUY.COM睇睇。

初初去錯o左SHOES.COM﹐發覺D價錢比SHOEBUY.COM貴$5 左右一樣款式。好在發現得快﹐去番SHOEBUY.COM買。到選o岩﹐又再搵下有冇網上COUPON﹐嘩﹗有20%OFF COUPON﹐SAVE番10蚊﹗唔使SHIPPING﹐唔o岩可以退換﹗真係好方便﹗﹗

南瓜月

十一月是吃南瓜的季節﹐今年多了位農夫弟兄﹐又有新鮮南瓜食﹗


不過切南瓜很吃力﹐唔似冬瓜﹑節瓜禁易切﹗我又無大菜刀﹗

我用這南瓜燜了豆豉排骨﹐因為本週比較忙碌﹐晚晚都有節目﹐這味餸應該可以食成個星期﹗﹗

如果可以住係車喱山

星期一如常早返工﹐早放工去大肚瑜珈﹗到o左第三堂﹐D女人開始發揮本色~雞啄唔段。五點開始﹐大家一路傾下D流感針荒﹐背痛問題呀禁﹗就講到五點二先開始。五點五十五就完啦﹗

老師問我住得禁遠都黎上堂?禁我係附近返工呀馬﹗

其實平時買餸﹐買其他野都係o係公司附近。車喱山都間唔中去下﹐而家上瑜珈﹐生仔堂都係o係車喱山.我都覺得好方便。乜野都有齊﹐唔似我住個度係荒山野領。如何唔係地稅貴﹐鄭生返工遠﹐樓價貴﹐我都想住車喱山﹗

完o左三福

星期六都做o左好多野﹐上晝去驗血﹐飲o左一支糖水﹐甜到呢~希望無超標(後來D媽媽們話第一次驗多數都超標﹐最後可能要驗多次三個鐘既測試﹗真係希望經過鄭生既非一般飲食訓練既我可以一次過PASS) 之後買BAGEL﹐整大早餐。


下午無驚無險終於都完成三福﹐之前板頭問若果考試唔合格O唔OK。禁其實學三福又唔係為o左考試﹐唔合格唔使死﹗不過真係好耐無考試﹐心情有D緊張﹐就連肚入面個個都緊張咪﹐星期五晚都無乜點訓﹐係到轉﹗

考完三福個個都話好肚餓﹗ 順便都要謝師既﹗﹗ 去了弟兄相熟中日餐館開餐﹗四時半出發﹐以為有大把時間﹐可以趕及七時團契﹐點知出餐好慢﹐眾女子又想食咪甜品至走﹐最後滾水淥腳﹐飛95公路﹐又遇到塞車﹐真係呢~唔好意思遲大到﹗﹗




晚上團契﹐陳牧講“應唔應該係教會講潮語”﹐因為遲到﹐大家已經好投入討論啦﹗又見到板頭同CREAM頭對打﹗好好笑﹗不過一聽個題目就知﹐負方會好難講﹗雖然最後係正方羸o左﹐不過我就覺得負方表現得出色D﹗可能正方既同學對聖經既認識唔係話好深﹐都無用聖經督負方﹗就係輸o左係呢度﹗﹗

完o左團契返到屋企﹐沖完涼就訓到死屍禁﹗半夜差D唔使去廁所﹗﹗

我懷疑睇唔睇得晒﹗﹗

首先要多謝身邊每一位給我意見的朋友﹑弟兄姊妹﹑長輩﹗人家與你非親非故卻每次見面都會慰問一番﹐雖然與這姊妹並不太熟識﹐但她卻借了這些書給我﹗希望可以好好的讀一下﹗﹗

考試+背默

已經好耐無考過試﹐仲要背默既﹐可能要數返大學要TAKE既歷史課。背書係我既弱項﹐由細到大都唔鍾意背書﹐所以亦因如此最後選了理科﹗

最近因為參加了三福﹐初初以為學多樣野係好既﹗既然唔識向人傳福音就學啦﹗估唔到由七月開始﹐一讀就讀到而家十一月。無諗過會讀禁耐之餘﹐亦無諗過原來自己既記性又再一落千丈﹐因為三福都要背幾多野﹐有經文﹐有大綱﹐真係有D壓力﹗ 好啦﹗明天是最後一堂﹐有大考﹗今晚要好好背咪D書﹐希望明天可以嘔返出黎﹗﹗

改名

原來改名好難﹗我才疏學淺﹐識字又唔多﹐想用既字用黎做名又有D怪﹗英文名既組合又唔多﹐要改到用其他語言﹐又好似浮誇o左d。

最近開始被人問及會改乜野名﹐講真仍然無乜頭緒﹗當然唔會用了華華的Precious 慕文﹐什麼欣宜﹐秀文﹐希兒都唔會用啦﹗

如果要改D好聽但無乜意思既名﹐身邊既朋友名字好多都用o左﹗如果要用聖經人物呢?!個範圍仲窄﹗﹗

之前鄭生話佢會改英文名﹐中文名留番比我﹐但係佢上網睇完D NAME LIST﹐一個個比我否決晒﹗真係佩服D小說家﹐改D名禁鬼型﹗﹗

萬聖節無乜特別

今年唔派糖﹐唔留係屋企避開萬聖節﹐感覺良好﹗只係去到唐人街買飯見到不少小朋友去D餐館 trick or treat。D小朋友一D都唔得意﹐好多都係志在拿糖﹐所以講真見到有D煩﹐而且還下著毛毛細雨﹐更加煩上加煩﹗

星期日 DayLight Savings, 撥慢一粒鐘﹐雖然多了一小時﹐但五點幾就天都黑晒﹐乜MOOD都無晒﹐又要適應天黑黑的日子。

係唔係又販賤呢﹗D無劇又要睇又要鬧﹗﹗之前睇o左一集攻心計﹐見到禁多女人﹐個樣又似長今﹐真係無晒心機去睇﹗富貴DOOR﹐ 尋晚睇o左一集﹐全部都係老戲骨﹐雖然我都唔後生啦﹗但係睇完第一集覺得自己好似後生o左﹐呂良偉演四十歲既男人﹐袁靚靚都係三十歲鬆D﹐做人呀妹﹗家燕媽媽就慘D﹐大呂良偉唔係好多就要演佢阿媽﹗我覺得好似睇緊十年前既創世紀差唔多﹗﹗

經姊妹極力推薦﹐報了大肚瑜珈班﹐唔係好貴﹗$64/8堂﹐個老師教得好好﹐雖然要早放工去上堂﹐但係上完真係成個人好思服﹗每次上完課個晚都會訓得好好﹗就算對生既時候無幫助﹐我都誠意推薦比各位姊妹﹐他日大肚都去TAKE o下呢D Class﹗

ABC 茶餐 + 販賤

唔知係唔係真既﹗移o左民既香趕人骨子裡總係好想食個D ABC茶餐。但係無奈本城附近(去到紐約都唔覺有)無一間好味既茶餐廳(聽聞係維真尼亞個邊有間好D既﹐不過車程都要三﹑四個鐘) 唔通開間好食既茶餐真係禁難?﹗

話說﹐本城最近又有一間自命趕式茶餐開張﹐於是星期日完了崇拜就大伙兒話要試下間新野。雖然有姊妹I話間自命趕式茶餐唔掂﹗但係我地唔信點都話要試下﹐好啦﹗販賤既時刻來臨﹗

經典既侍應姐姐﹐每落單一樣野就問我地幾錢架﹗係邊到架﹗真係呢~啤一聲﹗﹗

姊妹叫o左白汁唔知乜野焗飯﹐佢地話無白汁。禁改為黑椒豬排飯啦﹗出到呢~個黑椒汁有D怪﹐個飯又唔熱﹗

姊妹們叫o左奶茶咖啡﹐我無飲呀﹗不過佢地話好麻麻﹗﹗

姊妹叫o左窩蛋牛肉飯﹐但係因為D飯唔熱﹐隻蛋真係好RAW﹐我又無食﹗

我叫o左個鮑魚汁乾燒伊麵﹐D麵碎到呢~個鮑汁味有D怪怪﹗

仲有比我地笑呀靚靚叫既餐蛋治﹐出到呢~咦﹗得個荷包蛋治既﹗片餐唔知去o左邊﹐真係笑死我﹗

混醬腸粉﹐食得出係丁熱過囉﹗好彩有芝麻醬﹐都幾OK既﹗

滷水牛湯意﹐都OK既﹗無乜特別﹗

沙爺牛公仔麵﹐係個麵淰o左小小o者﹗

最正常既就只有個西多士﹐內有花生醬既﹗算係全場至好味架啦﹗

總結呢個販賤經歷﹐我深信呢間趕式茶餐應該唔會開得好耐~唉﹗好味既茶餐唯有等

1.去加拿大食
2.去加州食
3.返芝加哥食
4.返香港食

一拖再拖

原來寫BLOG唔可以拖﹐一拖就開始唔想寫﹐而且新野不停發生﹐真係拖拖下都唔知由邊度講起。

一向唔鍾意放題﹐但係偏偏鄭生又鬼禁鍾意﹐所以間唔時都會去佢認為好食既放題放肆一下﹗我覺得米國既放題大多數都係唔好食﹐米國人CHEAP﹐貴既放題唔捨得食﹐人家將價就貨﹐變了一大堆都要十幾蚊落樓既祖國放題。至於食壽司放題﹐得個一兩間﹐閒閒地亦都要廿蚊落樓﹐晚市更加去到成三十蚊位﹐我寧願去D貴餐廳叫餐好過啦﹗

好啦﹗講下上星期五去過既新開張壽司放題﹐以十多元的午餐來說﹐算係抵啦﹗門口寫十一時半開﹐我地十一點九去到﹐D野食先o岩o岩出﹐見到幾檯外國人都係坐係度等﹐只有鄭生第一個去睇下有冇野食﹗真係失禮街坊﹗食到十二點半﹐D野食先出齊﹗

鄭生同我都唔食生野﹐果D三文魚﹐吞拿魚既壽司無食﹐所以唔知新唔新鮮。食D熟既ROLL﹐即係富貴超市賣既7元8粒熟ROLL呢﹗都有四﹑五款選擇。我反而對熱食比較欣賞。有蝦﹑有蟹﹑有蜆﹐無食﹗不過睇落都幾好既﹗鄭生食o左幾多蜆﹐因為唔係個D豆豉醬蜆﹐而係好清既蒜容蜆﹗ 魚有四款:薑蔥龍琍﹐teriyaki三文﹐炸flounder卷同甜酸flounder卷。唔知係唔係祖國人開﹐始終都會有D蒸物﹐好似燒買﹐蝦餃﹐仲有奶皇包﹗ 湯例牌都有酸辣湯﹐蛋花湯同麵豉湯﹐鄭生好衰﹐BUTT 了碗有很多紫菜的麵豉湯。BUTT 晒D渣﹗﹗





甜品唔係太出色﹐不過都有紅豆雪糕﹐綠茶雪糕﹗當然唔係話好好食﹗紅豆雪糕無紅豆味﹐綠茶雪糕無綠茶味﹗但係有鄭生鍾意食既糯米慈﹐鄭生食o左三個﹗總括不太識食既鄭生就好滿意啦﹗我都覺得OK﹗話晒十一蚊一個人想點呀﹗



食完LUNCH就去JACKSON個OUTLET MALL﹐個MALL唔係好大﹐不過都有晒我要行既店舖。因為有雨天陰陰﹐行一陣又無乜野減價就返屋企訓啦﹗晚飯都只係飲湯就算啦﹗可能食到o齊o左﹗﹗

食舊餸的晚上

昨晚因為家中還剩下舊餸﹐鄭生今天又不用帶午餐﹐所以晚餐我只吃了湯渣+兩粒餃子便飽﹐省時省力。八時已經可以安安樂樂上網看FACEBOOK﹗

睇睇下﹐諗起前幾日買了幾個蕃薯。因為在靚靚生日飯吃過很好味的蕃薯伴碟﹐想試試自己整一個。材料很簡單﹐蕃薯+粟米片。因為怕肥﹐無加牛油﹐只係加了少少黃糖去焗。係無禁香﹐不過都OK喎﹗﹗算是飯後甜品﹗﹗


唔知呀靚仲記唔記得佢送既兩個花盆?

近排好懶﹐好耐無真真正正拎起本書睇﹐食完甜品想睇書﹐拎起本陳濟民既“保羅神學的十堂課”講因信稱義與信徒行為既矛盾。希望有心機睇晒佢﹗﹗

雨過天晴之後

過了三天又凍又濕的天氣﹐好天氣終於回來。這幾天都忙忙地﹐事原老世唔記得借o左我比TESTING﹐但又安排我其他工作﹐就係禁﹐一人分演兩角﹐要係D休息位做咪TESTING組D野﹐好在死線是下星期﹐仲有時間﹗﹗

週末因為天陰有雨又凍﹐雖然放假但係都無乜出街。唔出街係屋企就會身痕整野食﹗﹗

星期五的午餐整o左焗三文魚+炒意粉

星期五的下午茶﹐見支豆漿要飲就快過期﹐整了豆腐花。就禁買支豆漿整豆腐花都OK喎﹗不失為一個偷懶既方法﹗﹗


差D唔記得﹗﹗多謝菜氏夫婦既禮物﹗﹗好鬼潮﹗﹗好鍾意﹗﹗我會用佢去儲o個四百萬﹗﹗祝我成功啦﹗﹗

放假之後

唔知係唔係哥倫比亞日訓得多o左﹗之後個日訓得好差﹐醒o左又訓唔番﹗唔通真係食幾多﹐訓幾多係整定既??

自從鄭生與同事CARPOOL返工後﹐朝朝未夠六點就要起身﹐連累我亦被嘈醒。平日攰到隻積禁就可以訓番﹐一夠訓就訓唔番唯有起身﹐早D返工。

因為早起﹐食完午餐就想訓﹐再出去行o左陣﹐就更加想訓。捱到五點幾都係頂唔順早D收工﹐返到屋企﹐已經見到鄭生訓o左﹗ 我~為免夜晚又訓唔著﹐當然係去煮飯叫大少食飯﹐之後睇三福﹐玩o左一陣CAFE WORLD (又話無聊又要玩﹗﹗)都搞到十一點至訓。攰到呢﹗訓到好似死屍禁﹗今朝又回復八點先起身既情景﹗﹗

睇呢我都係賤命一條﹗﹗

哥倫比亞日

今日都做o左好多野﹐成十二點先起身﹐CHECK o下CAFE WORLD﹐FACEBOOK。煮個麵食D舊餸之後就去CHERRY HILL MALL 行下。想買運動褲。去了GAP﹐入o左D貨。再去FOOT LOCKER﹐又買o左兩條黑色運動褲做百搭﹗再行咪蘋果睇下部NANO好唔好玩﹗又行下蕉共﹐MACY’S。夠晒運動﹗﹗還是喜歡一個人行街買野﹐可以快快手手﹐又唔使人多意見多﹗﹗

再去美東買豬骨煲湯﹐奶奶教我煲黃黑豆豬骨﹐加幾片薑﹐都唔錯﹐又易煲﹗聽聞呢個湯水對女性好﹐黑豆可以預防頭髮變白﹗

去完美東再去SUPER-WALMART﹐最近在家附近開了一間SUPER-WALMART二十四小時服務﹐好方便又有SUPERMARKET 野買﹗不過無富貴超市D野禁新鮮﹗﹗

之後拿拿淋回歸準備晚餐﹐清蒸豆腐+竹笙雲耳素菜。初初唔識點切﹐上網CHECK CHECK﹐第一次整竹笙都OK喎﹗包竹笙買o左好耐都未有時間煮﹗今日終於開齋﹗﹗

再上網CHECK o下個CAFE WORLD﹐我覺得呢D禁既GAME真係有D無聊﹗又大食﹗開o左個GAME就唔使用部NETBOOK做其他野啦﹗

呢幾日

都係禁過啦﹗無乜特別﹗係晚晚有夢﹐搞到我十點半訓﹐八點半都唔願醒﹗攰到呢~

過了中秋﹐知道天氣一路會冷下去唔會再熱。昨晚就一於換被﹐薄羽絨換厚羽絨﹗係暖o左﹐唔使再訓到朝早變蝦米﹐但係張被重o左﹐轉身﹐反身就更覺難度﹗﹗

近排工作唔算好忙﹐同事J時時走過黎吹吹牛。這個同事J是上海人﹐都好好傾下﹐時時會講下佢眼中既中國上海﹐又講下佢工餘教既圍棋班係點樣訓練思維。我不懂圍棋﹐象棋亦不精﹐所以每次都係得個聽字。

星期一﹐哥倫比亞日﹐有得放假﹐但係鄭生要返工。睇黎都會留係屋企做屋企野﹗

中秋週末﹐紐約還是馬利蘭

星期五請了假。原先想放假不如去海灘啦﹗去馬利蘭海洋市啦﹗不過早幾日開始冷﹐去海灘怕冷死﹗禁不如去內陸睇鐘雨石啦﹗雖然我去過...但係鄭生又唔係話好感興趣﹗所以最後都係去MITSUWA食下野﹐再去紐約唐人街食晚飯就算﹗

好耐無去MITSUWA﹐原來裝修過晒﹐唔止食堂大o左光猛o左﹐連個廁所都大o左好多﹗同鄭生食o左炸物飯﹐我點了炸雞扒﹐鄭生食炸蠔﹑炸魚﹗一時唔醒起鄭生唔食得飯﹐最後我食o左一碗半飯﹐好飽﹗鄭生之後再去買煎餃子﹐食完仲話唔飽又叫多個紅豆雪糕﹗兩個人食LUNCH都食o左成$30﹐真係大食﹗﹗

之後行下超市﹐書局﹐碗碟舖﹐無乜野想買。鄭生話去下隔離既DRIVING RANGE睇下貴唔貴。一籃70個波$10﹐價錢OK﹐當然相比我家附近的高球場﹐這裡比較貴﹐不過風景宜人﹐可以望到河景﹐鄭生話D波仲好乾淨下。鄭生二話不說就買了一籃波﹐租了球掍﹐打到四點﹗

之後再去NY﹐都幾好無乜塞車。四點幾就去到唐人街﹐又未夠鐘泊免費街位﹐於是泊入停車場。嘩﹗貴o左一倍﹐之前$4﹐ 4個鐘而家要$8。唔怪得停車場有大把位﹗

未禁早食飯﹐要鄭生陪我行UNIQLO﹐嘩﹗唔係呀﹗要排隊入﹐好在都係排o左兩分鐘就入到去﹗人頭湧湧﹐有金濕咩?﹗個個原來係睇條新LINE +J﹐點知...唔知係唔係唔夠人手﹐女裝部CLOSEo左﹗真係頂頂上心頭﹗唔夠幾分鐘就兩手FING FING出翻去﹐又行翻去唐人街食飯...運吉﹗﹗

鄭生想叫餸食飯﹐我就無所為﹐唔係BUFFET就得啦﹗但係好耐無o係唐人街叫餸食飯﹐唔知邊間好﹐邊間唔搵笨喎﹗於是每行過一間所謂既酒家都望一望入去﹐睇下有冇唐人食先﹗最後行到一家叫三哥既酒家﹐見到三﹑四圍唐人﹐應該無錯啦掛﹗又有大大隻字寫住鄭生想食既一魚兩吃。就係禁﹐係間三哥叫o左一魚兩吃﹐蒜蓉豆苗﹐XO醬炒花蜆。一魚兩吃OK喎﹐豆苗都唔錯﹐係個花蜆唔係好得﹐都無XO醬既﹗食o左五十幾蚊﹐算係做節啦﹗

之後去買豆腐花﹐又去達昌買熟餸﹐好低喎﹗臨收工既熟餸﹐$2.5就一大盒﹐買咪佢星期六唔使煮飯就有得食﹐又去寶榮行買冬菇。拎住好鬼多野返車﹐下次真係要帶架買餸車去買餸﹐唔使拎到死死下﹗