最新動向

最近無乜動力去UPDATE個BLOG﹐可能係因為日日都好唔PRODUCTIVE﹐排都排唔到時間去UPDATE下。放工>買餸>煮飯>洗碗>沖涼>再上o下網就已經十一點﹐夠鐘訓啦﹗

見我仲可以打禁多隻字﹐就知我未生得既﹗不過唔知係唔係比人問得多﹐都發過幾次生仔夢﹐因為瞓到o蒙查查﹐都唔知係真胎動定係假胎動﹐搞到我無覺好瞓。雖然唔會由五十開始COUNT DOWN﹐但係日子臨近都咪話無壓力。野就準備得七七八八架啦﹗要買既床仔話無貨﹐CANCEL o左我地既ORDER﹐搞到要o拿o拿淋事事但買過張﹗要搞既產假申請﹐因為唔知邊日係個B出世日子﹐所以又要HOLD住﹐煩到呢~

收爐

唔覺唔覺又過o左成個幾星期。B子回歸雖然只係短短逗留數天﹐但係日日都好充實。同小C子﹐E太郎玩下。畫下畫﹐睇下Thomas Train﹐之後行下MALL禁又一日﹗難怪要照顧小朋友的全職媽媽時常說時間會過得好快﹗

放完聖誕﹐公司仲有好多人放緊假﹐好靜﹗﹗但係D MANAGEMENT為o左迎合客戶既需要﹐有好多RELEASE想趕出街﹐最後搞到大家要返工既日子多o左好多野做﹗仲以為可以收爐﹐點知放假前仍然要做到七點幾至走得﹐可能相比香趕呢D時間係正常﹐但係我呢D懶蟲公司﹐五﹑六點D人就走晒啦﹗邊到會有人留得禁夜呀﹗之後仲要十一﹑二點回覆D EMAIL至搞掂﹗如果唔係諗住係收爐吉日﹐真係未必會做到禁夜﹗

尋日同今日就放咪D假﹐尋日出NY諗住產前剪短D頭髮同咪行下UNIQLO。凍到呀媽都唔認得﹗戴晒帽頸巾都好冷下﹗D鼻水不停禁流。凍到禁﹐都無影到相﹗頭髮剪o左好多﹐回復中學時代既短髮。爽晒﹗好易打理﹗連洗頭水都可以用小D﹗﹗

UNIQLO超多人﹐尋日都算係閒日﹐但係排隊比錢排o左成廿分鐘﹗唔算勁減都禁多人﹗如果佢好似GAP禁上市﹐我一定會買佢﹗見到香趕好多人提及既199羽絨﹐D COLOR 係幾SHARP 既﹐不過我覺得太薄呢邊未必夠用﹗反而+J D絨褸 $70 幾就有件都心郁郁﹐不過而家禁既身世﹐完全無MOOD買衫﹗﹗

之後行返去唐人街﹐食吊片肉餅煲仔飯 + 薑蔥魚頭煲﹗好好味﹗鄭生唔飽要加多個咖喱牛尾煲﹗食淨半煲打包返屋企。

假期前的最後星期五

印度同事提議慶祝聖誕﹐同事們一同出外午餐。

平日大家都是各自帶飯﹐為要與同事們多一點溝通﹐這種飯局唔想去都要去下。因為係印度同事提議﹐所以食印度包肥。係南澤西﹐都幾多印度包肥餐﹐其實唔算好貴﹐$13.5。不過與中國包肥相比﹐真係少好多野食。食黎食去都係咖喱﹐有肉得兩種:一係雞﹐一係羊。反而我幾欣賞D雞心豆咖喱。

食完飯﹐與同事吹水一番﹐個個又問我幾時生得﹐佢地又講下佢地D湊仔心得。容乜易又個幾鐘﹐食飽一陣咖喱味返到公司!

年尾

話禁快又到年尾﹐今年亦不例外﹐B子一家會到訪﹐所以一早請了假。又請了假過年﹐這樣還有明天要返工﹐聖誕之後再返兩天工﹐就可以收爐﹗諗起都開心﹗﹗希望可以在全無工作動力下平平淡淡渡過﹗

假期總是食﹑食﹑食﹐為o左唔好增太多磅數﹐這星期都以蒸餸為主﹐亦係無飯夫妻﹐昨晚弄了芋頭蒸排骨+豆腐牛肉+烚菜﹐不過聽聞芋頭都幾肥下﹐而且吸收了排骨既精華﹐味道OK﹐不過我諗唔可以時時食。幾天前又買了火雞餃肉和豬餃肉﹐今晚會試下將兩者結合加冬菇粒黎蒸﹐希望唔會好似淨豬肉禁肥﹗﹗我知D餸唔肥唔好食﹐但係太好食又話唔健康﹐真係人生一個大矛盾﹗﹗

多謝晒﹗我唔客氣啦﹗

剛過去的週末﹐雖然天氣唔係話禁好﹐但係好多謝一班姊妹安排既SHOWER﹐我厚面皮﹑唔使SURPRISE我﹐當然o係禮物與禮金之間我比較鍾意後者﹐而且你地又唔使諗暴頭要送乜﹐不過你地送既我一定鍾意﹗﹗仲有星期天的夫婦團契送既禮物﹐我地唔係時時參加﹐你地都送禮﹐真係搞到我都唔好意思收﹗仲有大家寶貴既湊仔經﹐真係買都買唔到﹗放心啦﹗單身團契我地唔去得架啦﹗點都會升團。仲要多謝其他弟兄姊妹﹐有遠方既﹐近方既﹐你地既禮物﹐我代我肚入面o個個多謝你地﹗﹗

多謝完畢﹐又要多謝CREAM頭個“下流上游”LINK﹐因為鍾意睇新聞透視﹐由佢個LINK﹐仲比我搵到萬千星輝頒獎禮﹐本來唔諗住睇四奶奶同柴九﹐但係有o係到就睇咪啦﹗我覺得李添勝實至名歸囉﹗

情迷蒸肉餅

最近時時想食蒸肉餅﹐好啦﹗今晚本來想買外賣既蒸肉餅飯﹐不過賣晒﹗禁不如買餃肉自己蒸啦﹗再買o左樽冬菜﹗原來真係好易整~下次唔使再係唐人街買呢個餸﹗

加過粉絲菜﹐加咪Za姐既靚湯﹐買o左個支竹羊腩飯﹗成為三餸一湯既晚上﹗﹗

唔覺唔覺﹐D時間快過到呢

當晚晚有野做﹐D時間真係過得快到你唔信。

週末﹐報讀了摩西五經。最初都怕自己頂唔順﹐要坐成廿個鐘聽書﹐個肚又頂心頂肺。雖然中途都有D攰﹐好似每次食完飯都會想瞓禁﹐不過﹐好好彩有三位姊妹一整報讀﹐聽唔到可以問返佢地﹐再一次睇到人唔可以獨家村﹐有其他人陪著係開心好多既﹗咪就係聖經話“那人獨居不好囉﹗﹗”馬牧師又教得好好﹐如果可以用廣東話教仲好﹗好可惜本城粵語人喜歡上這類課的不多﹐不能獨立開班。下一次既課程係周牧師既基督論﹐下年四月﹐唔知仲可唔可以報讀﹐希望可以啦﹗﹗
因為課程是密集式﹐星期六﹑日的膳食都在唐人街解決。發現唔係好多間食市可以一食再食﹐不過多人悶人既介紹發現到蒸肉餅飯﹐真係唔錯﹗麻煩在要等好耐o者﹗

星期一﹐經過之前既三日腦力透支﹐返工都幾攰下。又要放早上瑜珈﹐話禁快仲有一堂就完。番到屋企諗住o拿o拿淋煮飯﹐好在鄭生CALL到﹐話要去BB R US買GIFT CARD比同事﹐又唔煮得飯啦﹗買完全GIFT CARD﹐食墨佬野﹐去番CHILIS食廿蚊餐﹐鄭生要了MINI TACO﹐我叫番燒雞通粉。個MINI TACO真係好細下﹐但係我就食唔晒個燒雞通粉﹐可以打包做第二日既LUNCH。超飽回歸﹗﹗

星期二﹐如常上班﹐之後要覆診。嘩﹗人多到呢~唔怪得D醫護人員個個都面黑黑啦﹗我早到o左十分鐘都要等o左45分鐘先入房﹐又係見唔夠五分鐘就出番黎。上次驗血糖OK﹐但發現鐵質唔夠﹐要食鐵丸。我已經食多o左肉架啦﹗特別係牛﹗D媽媽們又叫我唔好食禁多牛﹐食得多牛會無得去廁所(我覺得食番多D菜平衡番就得﹗)。所以話呢﹐如果聽晒所有意見去食野﹐我諗我會更加營養不良﹗﹗

感恩節的感恩

禁又過o左幾天的感恩節假期﹐的確十分感恩。節日中食o左好多野﹐睇o左好多電視﹐ 瞓o左唔係好多﹗﹗

星期四晚﹐家人聚餐。最暢消既係焗雞翼﹐食剩最多既係排骨同火雞胸。禁樣睇黎出年如果再搞家人聚餐﹐都應該唔會整火雞胸﹐至多整火雞腿。不過之後用火雞胸煲又真係好好味﹗食完飯﹐家人們就開始網上購物行動﹐等待BLACK FRIDAY 既來臨。不過未到BLACK FRIDAY﹐所以價錢企硬。

星期五CHECK BLACK FRIDAY ON SALE既野﹐好啦﹗大減特減﹐豪買了嬰兒車﹐ BOUNCER﹐遲o左起身已經買唔到床仔。仲有出o左兩部電話﹐財散人安樂﹗﹗是夜有幸被要請到CREAM氏夫婦家晚宴﹐所以去了車喱山MALL走一趟﹐人頭湧湧﹗o係米國真係好少見到禁既場面﹐行o左一陣無野想買﹐又熱又焗﹐於是逃離現場去BARNES & NOBLE睇雜誌好過﹗睇o左一陣﹐CALL板頭﹐殺上CREAM家﹐唔係第一次到訪﹐不過仍然唔記得房號碼﹐唯有CALL CREAM頭落黎開門﹐辛苦晒﹗等咪其餘兩PAIRS﹐傾下﹐食下﹐笑下﹐打機﹗﹗一樂也﹗

星期六鄭生要幫朋友搬屋﹐我因為太攰﹐留番係屋企上網睇宮心計﹐睇o左幾集﹐集集都會重複乜野係三好﹗都幾洗腦下﹗都好既~而家既城市人都係需要多D呢種再教育﹗﹗ 不過正如華子話齋﹐呢個世界有冇人會好似佘詩曼個角色禁好得交關架?仲要係好人有好報喎﹗

星期日﹐受洗+福音主日﹐唔知點解次次見到有人受洗都會好感動。希望各位受洗既弟兄姊妹﹐好似麥牧師禁講要長進﹗﹗ 之後去o左櫻花食飯﹐都幾好食既﹐細細碟﹐都貴貴地啦﹗食o左D上海菜﹐圓蹄OK喎﹗至好食都係三杯雞﹗﹗

BLACK FRIDAY

這幾年的BLACK FRIDAY 都不在本市渡過﹐今年總算不用回鄉探親。於是上網睇睇BLACK FRIDAY 有乜野減價﹗當中真係有好多好低既DEAL。不過相機又未壞﹐電腦又有啦﹗禁又無理由再使錢買既﹗所以而家都係得個睇字﹗仲要一路睇一路忍﹗﹗

心郁郁想買電話

收到公司送既十年木牌﹐時間飛逝﹐禁就獻出o左我既黃金十年﹗﹗木牌背後竟然貼有一張400大元既GIFT CERTIFICATE。哈哈哈﹗雖然我鍾意現金多D﹐不過﹐好過五年服務既禮物包。

有錢就身痕(阿大劉話既)﹗﹗個腦即刻浮現出想買既IPHONE﹐係好OUT架啦﹗不過仲係十五﹑十六﹗﹗唔知好唔好買﹗﹗之前想買BLACKBERRY﹐不過問o左好多人都話唔好買﹗﹗用緊IPHONE既同志﹐好唔好買呀?

之後CHECK下張GIFT CERTIFICATE﹐好多地方都用唔到既﹗﹗唔係間間SHOP都收﹗﹗一場歡喜一場空﹗﹗可能用張GIFT CERTIFICATE 買KITCHEN-AID算啦﹗﹗

臨放工李老闆打電話黎傾o左兩句公司既是非﹐搞到成六點八至走﹐即刻飛車番屋企煮飯﹗昨日晚餐

芥蘭牛 + XO 醬炒意粉

家居急救常識 - Don't Panic

雖然我唔係醫護人員﹐但係就越來越覺得每個家庭成員都需要學一些家居急救學既知識﹐就算唔識急救都要識一樣野"Don't Panic"。

話說鄭生個鼻一向都會好易流血﹐佢又時時多手搞佢﹐令流血的情況越來越嚴重。有見及此﹐我哦o左佢好耐要佢睇專科醫生﹐前個星期終於睇o左。佢話醫生放o左D藥物入鼻﹐令佢唔係好舒服﹐不過醫生話過幾日D藥會自己出番黎唔使擔心。

就係尋晚食完肉球意粉﹐佢又係到搞個鼻﹐終於個鼻又出血。初初都無乜野﹐佢用D紙塞住佢都無流血。禁我就去梳洗啦﹗沖到一半聽到鄭生大叫話好多血。搞到我要o拿o拿淋沖咪個半去睇下佢乜野事。好在我以前中學時代學過下D急救既常識﹐一睇之下﹐係D血不停禁滴﹐但係唔係水柱個種﹐禁我咪要鄭生坐定﹐用手同D紙按實出血地方等半個鐘﹐睇下仲有無流啦﹗

雖然按o左半個鐘仲有流﹐不過無好似個水喉禁滴滴滴都已經好好啦﹗所以Don't Panic真係好緊要﹐就算唔知點做都要識得打電話CALL白車﹗

見佢個騰雞樣﹐我真係有D擔心﹐佢係產房會唔會暈低﹗

今日借o左

天陰陰﹐毛毛雨﹗﹗

本週末鄭氏劇場會睇﹕The break-up﹐舊野黎既﹗仲未睇﹗

尋晚開會﹐樑木講起呢本書 The Case for Faith﹐見圖書館有﹐借咪番屋企睇﹗

仲有WARREN BUFFETT 既 THE SNOW BALL﹐好鬼厚﹗都係借AUDIO BOOK 好﹗

網上購物

網上購物其實唔係新鮮﹐不過就好似只有外國才盛行﹐香趕買野實在太方便﹐而且時時都有減價﹐唔使係網上買平野﹗﹗
之前一路搵﹐想買對無尾波鞋﹐方便出街唔使著鞋著得辛苦。去OUTLET見唔到﹐去KOHL’S﹐ TARGET﹐TJ MAXX個D都無﹐唔知係唔係就快冬天換季﹐定係已經唔興OUT晒﹗一路都搵唔到﹗今朝先醒起﹐可以去SHOEBUY.COM睇睇。

初初去錯o左SHOES.COM﹐發覺D價錢比SHOEBUY.COM貴$5 左右一樣款式。好在發現得快﹐去番SHOEBUY.COM買。到選o岩﹐又再搵下有冇網上COUPON﹐嘩﹗有20%OFF COUPON﹐SAVE番10蚊﹗唔使SHIPPING﹐唔o岩可以退換﹗真係好方便﹗﹗

南瓜月

十一月是吃南瓜的季節﹐今年多了位農夫弟兄﹐又有新鮮南瓜食﹗


不過切南瓜很吃力﹐唔似冬瓜﹑節瓜禁易切﹗我又無大菜刀﹗

我用這南瓜燜了豆豉排骨﹐因為本週比較忙碌﹐晚晚都有節目﹐這味餸應該可以食成個星期﹗﹗

如果可以住係車喱山

星期一如常早返工﹐早放工去大肚瑜珈﹗到o左第三堂﹐D女人開始發揮本色~雞啄唔段。五點開始﹐大家一路傾下D流感針荒﹐背痛問題呀禁﹗就講到五點二先開始。五點五十五就完啦﹗

老師問我住得禁遠都黎上堂?禁我係附近返工呀馬﹗

其實平時買餸﹐買其他野都係o係公司附近。車喱山都間唔中去下﹐而家上瑜珈﹐生仔堂都係o係車喱山.我都覺得好方便。乜野都有齊﹐唔似我住個度係荒山野領。如何唔係地稅貴﹐鄭生返工遠﹐樓價貴﹐我都想住車喱山﹗

完o左三福

星期六都做o左好多野﹐上晝去驗血﹐飲o左一支糖水﹐甜到呢~希望無超標(後來D媽媽們話第一次驗多數都超標﹐最後可能要驗多次三個鐘既測試﹗真係希望經過鄭生既非一般飲食訓練既我可以一次過PASS) 之後買BAGEL﹐整大早餐。


下午無驚無險終於都完成三福﹐之前板頭問若果考試唔合格O唔OK。禁其實學三福又唔係為o左考試﹐唔合格唔使死﹗不過真係好耐無考試﹐心情有D緊張﹐就連肚入面個個都緊張咪﹐星期五晚都無乜點訓﹐係到轉﹗

考完三福個個都話好肚餓﹗ 順便都要謝師既﹗﹗ 去了弟兄相熟中日餐館開餐﹗四時半出發﹐以為有大把時間﹐可以趕及七時團契﹐點知出餐好慢﹐眾女子又想食咪甜品至走﹐最後滾水淥腳﹐飛95公路﹐又遇到塞車﹐真係呢~唔好意思遲大到﹗﹗




晚上團契﹐陳牧講“應唔應該係教會講潮語”﹐因為遲到﹐大家已經好投入討論啦﹗又見到板頭同CREAM頭對打﹗好好笑﹗不過一聽個題目就知﹐負方會好難講﹗雖然最後係正方羸o左﹐不過我就覺得負方表現得出色D﹗可能正方既同學對聖經既認識唔係話好深﹐都無用聖經督負方﹗就係輸o左係呢度﹗﹗

完o左團契返到屋企﹐沖完涼就訓到死屍禁﹗半夜差D唔使去廁所﹗﹗

我懷疑睇唔睇得晒﹗﹗

首先要多謝身邊每一位給我意見的朋友﹑弟兄姊妹﹑長輩﹗人家與你非親非故卻每次見面都會慰問一番﹐雖然與這姊妹並不太熟識﹐但她卻借了這些書給我﹗希望可以好好的讀一下﹗﹗

考試+背默

已經好耐無考過試﹐仲要背默既﹐可能要數返大學要TAKE既歷史課。背書係我既弱項﹐由細到大都唔鍾意背書﹐所以亦因如此最後選了理科﹗

最近因為參加了三福﹐初初以為學多樣野係好既﹗既然唔識向人傳福音就學啦﹗估唔到由七月開始﹐一讀就讀到而家十一月。無諗過會讀禁耐之餘﹐亦無諗過原來自己既記性又再一落千丈﹐因為三福都要背幾多野﹐有經文﹐有大綱﹐真係有D壓力﹗ 好啦﹗明天是最後一堂﹐有大考﹗今晚要好好背咪D書﹐希望明天可以嘔返出黎﹗﹗

改名

原來改名好難﹗我才疏學淺﹐識字又唔多﹐想用既字用黎做名又有D怪﹗英文名既組合又唔多﹐要改到用其他語言﹐又好似浮誇o左d。

最近開始被人問及會改乜野名﹐講真仍然無乜頭緒﹗當然唔會用了華華的Precious 慕文﹐什麼欣宜﹐秀文﹐希兒都唔會用啦﹗

如果要改D好聽但無乜意思既名﹐身邊既朋友名字好多都用o左﹗如果要用聖經人物呢?!個範圍仲窄﹗﹗

之前鄭生話佢會改英文名﹐中文名留番比我﹐但係佢上網睇完D NAME LIST﹐一個個比我否決晒﹗真係佩服D小說家﹐改D名禁鬼型﹗﹗

萬聖節無乜特別

今年唔派糖﹐唔留係屋企避開萬聖節﹐感覺良好﹗只係去到唐人街買飯見到不少小朋友去D餐館 trick or treat。D小朋友一D都唔得意﹐好多都係志在拿糖﹐所以講真見到有D煩﹐而且還下著毛毛細雨﹐更加煩上加煩﹗

星期日 DayLight Savings, 撥慢一粒鐘﹐雖然多了一小時﹐但五點幾就天都黑晒﹐乜MOOD都無晒﹐又要適應天黑黑的日子。

係唔係又販賤呢﹗D無劇又要睇又要鬧﹗﹗之前睇o左一集攻心計﹐見到禁多女人﹐個樣又似長今﹐真係無晒心機去睇﹗富貴DOOR﹐ 尋晚睇o左一集﹐全部都係老戲骨﹐雖然我都唔後生啦﹗但係睇完第一集覺得自己好似後生o左﹐呂良偉演四十歲既男人﹐袁靚靚都係三十歲鬆D﹐做人呀妹﹗家燕媽媽就慘D﹐大呂良偉唔係好多就要演佢阿媽﹗我覺得好似睇緊十年前既創世紀差唔多﹗﹗

經姊妹極力推薦﹐報了大肚瑜珈班﹐唔係好貴﹗$64/8堂﹐個老師教得好好﹐雖然要早放工去上堂﹐但係上完真係成個人好思服﹗每次上完課個晚都會訓得好好﹗就算對生既時候無幫助﹐我都誠意推薦比各位姊妹﹐他日大肚都去TAKE o下呢D Class﹗