兩牙遊記(二)

八月二十八日 勁勁太陽

雖然是勁勁太陽﹐位於北面的Salamanca 是比較清涼而且乾到秘(我用La Mer Cream 都只係o岩o岩好﹐而且還要不時補Cream)。因為昨晚太倦的關係﹐我同IT睡到差唔多九點幾至識醒﹐如果唔係IT帶備超勁大聲鬧鐘而且還有響鬧多次功能﹐我想我們是可以睡至下午。

經過昨天一天的勁晒﹐我同IT都黑了不少﹐所以今日我們不敢怠慢﹐搽足防晒出發。西班牙人的生活時間比較晚﹐在小城鎮如Salamanca﹐舖頭大約在十至十一時才開門的。午飯由兩時半到四時半﹐晚飯由十點半開始。可想而知他們的夜生活是多麼豐富。對於在花旗生活了好一段日子的我﹐是有點不習慣。八點幾我已經餓到咕咕聲﹐但大多數的餐館還未開門或在準備中。

Salamanca 是個大學城﹐但我唔係見到好多學生出入。我們的酒店是在Plaza Mayor 後面﹐十分方便。只要步行﹐便可遊覽整個Old Town。可能Salamanca 是大學城的關係﹐這裡沒有像Madrid等大城市的雜。反而有時是我們的警覺性太高﹐成日都左望望﹐右望望。IT話我地似賊多D喎﹗不過都係小心D好﹐唔想有乜事發生呀馬﹗

如果你有去過歐洲﹐你會發現﹐好多小城鎮都有一個廣場同一間教堂﹐我想就似中國人,每條村都有一間鄉公所一樣。除了Plaza Mayer﹐我們還到了Casa de las Conchas﹐一幅有很多貝殼在外牆﹐都幾特別。之後在Lisbon 同Granada都見到類似的牆。Catedral Vieja 同Catedral Nueva﹐新舊church合併在一起﹐而且是歌得式建築﹐十分宏偉。

中午我們便離開Salamanca﹐向葡萄牙的Lisbon進發。在地圖看﹐駕車只要五個多小時便可到達。可能Salamanca是一個比較小的城鎮﹐路牌指示奇差。我跟住出Highway的路牌﹐可以跟跟o下唔見o左。禁又要靠IT去問路﹐大多數的西班牙人都十分好﹐有問必答﹐但只答西班牙語﹐佢地仲好好人畫個地圖比我地。可惜D地圖太過簡單﹐我最後都只係信由酒店供應的地圖﹐於是又獎行N次﹐以我們的不屈不撓o既精神﹐用o左成粒鐘至上到N620公路。沿途景色得個"乾"同"黃"字﹐無乜野睇﹐不過特別之處係好多地方名係同加州的地方名相同Las Vegas, Los Angeles, San Francisco 等都見到。

入到葡萄牙境﹐景象完全不同。多D綠色同可用英語溝通﹐這兩點也足夠使我們愛上葡萄牙。在公路上的Rest Area 和花旗一樣﹐有入油同食野o既地方﹐我在Rest Area便嘗到在葡萄牙的第一個葡Tart。可能靚靚等人話過我知葡萄牙的葡Tart沒有在香江或澳門的禁好食﹐所以在食這個涷冰冰又甜椰椰o既葡Tart時﹐唔係好失望﹐仲覺得幾得意添。一路駕車入Lisbon﹐就好似返o左花旗禁﹐沿途有Staples, IKEA等大公司。

照住酒店服務員的指示﹐我們到了Lisbon的中心Baixa﹐都差唔多九點幾﹐但周街都係人。我地駕車行行o下就上o左個山度﹐遠望葡萄牙夜景的確幾靚同浪漫的﹐可是只得我同IT﹐唉﹗ 在山頂的旁邊有多個檔攤﹐我地走去睇睇﹐其中一檔有個女仔﹐不停介紹佢賣o既野﹐我地都幫襯o左唔少﹐佢仲介紹我地去Alfama度睇Fado﹐講講o下﹐我地問佢唔知禁夜仲有冇得睇﹐佢話九點鐘應該無問題﹐但我隻錶明明指住十點。原來葡萄牙同西班牙係相差一粒鐘﹐嘩﹗賺了一粒鐘﹐我同IT都不知幾開心。雖然最後我地都冇去睇Fado﹐但對這個女仔友善地介紹葡萄牙﹐我地覺得駕車到葡萄牙那麼遠也是值得。(待續)

小貼士﹕去完Segovia 同Salamanca﹐再到葡萄牙Lisbon。論食野Lisbon 近海﹐D海鮮好食D。論景點Lisbon 始終係首都而且向海﹐我鍾意葡萄牙多D﹐如果無乜時間(好似我地禁)﹐我個人覺得可以Skip Segovia 同Salamanca 啦﹗